કશે વહેતી નદી થઈને પહાડોથી લપસ્યું છે,
કશે ભેગું થયું છે ને જળાશય એ જ બન્યું છે,
ભરોસો છે નહીં એનો છતાં એ વાત છે સાચી,
કશે એ કાળની માફક બનીને પૂર ધસ્યું છે,
કદી અદ્રશ્ય બન્યું તાપની સાથે મળીને એ,
અને આકાશમાં વાદળની અંદર જઈને વસ્યું છે,
કરે છે વાત સાથે મિત્રતા એવી પછી તો એ,
અને મેઘો બનીને એ ધરા ઉપર વરસ્યું છે,
નથી નેઠા કદી એના અહીં બસ એ જ કારણથી,
જગતમાં ક્યાંક છે તૃપ્તિ અને કોઈ તરસ્યું છે.
સ્તબ્ધ – કૌશલ શેઠ