ઘણું મથવું પડે

આ જગતમાં જાતને મળવા ઘણું મથવું પડે,
ને અકડ છોડી બધી વળવા ઘણું મથવું પડે,

પંથ લાંબો કાપવામાં થાક પણ લાગે નહીં,
ને કદી ડગ બે અહીં ખસવા ઘણું મથવું પડે,

દૂરથી દેખાય જળ એ જળ નથી હોતા બધા,
ઝાંઝવાને એ બધા અડવા ઘણું મથવું પડે,

આ સમયનો પણ અહીં નેઠો કદી હોતો નથી,
યુગ વીતે પળમાં કદી ક્ષણમાં ઘણું મથવું પડે,

ખૂબ સહેલું લાગશે ચઢવાનું ઊંચા પર્વતે,
ટોચ પર પહોંચ્યા પછી ટકવા ઘણું મથવું પડે,

હા, લડી લેવું બધાં સાથે ઘણું આસાન છે,
જાત સાથે “સ્તબ્ધ”ને લડવા ઘણું મથવું પડે.

સ્તબ્ધ- કૌશલ શેઠ